Հայաստանի պետական սիմֆոնիկ նվագախմբի հիմնադիր, գեղարվեստական ղեկավար և գլխավոր դիրիժոր Սերգեյ Սմբատյանը մեծ ճանաչում է վայելում ինչպես Հայաստանում, այնպես էլ միջազգային մշակութային միջավայրում: Մալթայի ֆիլհարմոնիկ նվագախմբին որպես հրավիրյալ դիրիժոր ղեկավարելով Գերմանիա, Ավստրիա և Միացալ Նահանգներ կատարած համերգային շրջագայությունների ընթացքում և հատկապես Բեռլինի ֆիլհարմոնիայում, Վիեննայի «Մուզիքֆեղայն» և Նյու Յորքի «Քարնեգի Հոլ» համերգային դահլիճներում նվագախմբի ունեցած հաջողակ ելույթներից հետո 2019թ․ Սերգեյ Սմբատյանը հրավիրվել է ղեկավարելու նվագախումբը որպես գեղարվեստական ղեկավար և գլխավոր դիրիժոր։

Հիմքից սիմֆոնիկ նվագախումբ ստեղծելու իր փորձով զինված՝ Սերգեյ Սմբատյանը վերջին տարիներին ստեղծել է չորս այլ նվագախմբեր ևս: 2015 թվականին նա ստեղծեց «24/04» նվագախումբը՝ ի հիշատակ Հայոց ցեղասպանության 100-ամյակի, իսկ այնուհետև՝ «Անկախության սերունդ» համահայկական նվագախումբն ու երգչախումբը՝ Հայաստանի Հանրապետության անկախության 25‑ամյակին նվիրված միջոցառումների շրջանակում: Նա նաև հավաքել է ՅՈՒՆԻՍԵՖ-ի մանկական կամերային երգչախումբը՝ նվիրված Երեխայի իրավունքների մասին կոնվենցիայի ընդունման 20-ամյակին և , որի նպատակն ամփոփված էր աշխարհասփյուռ հայության միավորման գաղափարում: Որպես կրթության և նորարարության ջատագով՝ Սերգեյ Սմբատյանը Հայաստանի պետական սիմֆոնիկ նվագախմբի հետ ստեղծել է ավագ դպրոցի աշակերտների համար նախատեսված «ԴասA» նախագիծը, որն աշակերտներին հնարավորություն է ընձեռում մոտիկից ծանոթանալու դասական երաժշտությանը:

Սերգեյ Սմբատյանի կարիերայի համար նշանակալից առաջխաղացում էին վերջին ժամանակների համերգաշրջանները, որոնց ընթացքում որպես հրավիրյալ դիրիժոր ելույթ է ունեցել Բեռլինի, Վարշավայի, Երուսաղեմի, Պրահայի ռադիոյի սիմֆոնիկ նվագախմբերի, Դրեզդենի ֆիլհարմոնիկ նվագախմբի, Բեռլինի «Կոմիշե օպեր» և այլ երաժշտական կոլեկտիվների հետ: Մալթայի ֆիլհարմոնիկ նվագախմբի 2021-2022 համերգաշրջանի Եվրոպական տուրի շրջանակում Սերգեյ Սմբատյանը նվագախմբի հետ հանդես է եկել Բեռլինի ֆիլհարմոնիայի և Վիեննայի «Մուզիքֆեղայն» դահլիճներում, իսկ 2022-2023 համերգաշրջանում կղեկավարի նվագախմբի ելույթները Միացյալ Թագավորությունում անցկացվելիք առաջին համերգային տուրի ընթացքում:

Իտալացի դիրիժոր Ջանլուկա Մարչիանոն երաժշտական աշխարհում ավելի ու ավելի սպասված դարձավ 2007 թվականին Խորվաթիայի ազգային օպերայի հետ իր դեբյուտային ելույթից հետո։ Մարչիանոն հանդես է եկել Օվիեդոյի, Մինսկի, Լյուբլյանայի, Երևանի, ինչպես նաև Մեծ Բրիտանիայի օպերային թատրոնների հետ։

Մարչիանոն Բեյրութի «Ալ Բուստան» փառատոնի գեղարվեստական ղեկավարն է։ Նա նաև Իտալիայի Լերիչի քաղաքում անցկացվող «Suoni dal Golfo» փառատոնի հիմնադիրն ու գեղարվեստական ղեկավարն է, ինչպես նաև Բելառուսի ազգային ակադեմիական մեծ թատրոնի հրավիրյալ գլխավոր դիրիժորը։ 2011-2014թթ. նա եղել է Թբիլիսիի պետական օպերայի երաժշտական ղեկավարը և գլխավոր դիրիժորը։ 2017-2017 թթ. Մարչիանոն եղել է Նովի Սադի Սերբական ազգային թատրոնի գլխավոր դիրիժորը:

Որպես դիրիժոր Մարչիանոն ելույթ է ունեցել անվանի շատ երաժիշտների հետ, այդ թվում՝ Գոթիե Կապյուսոնի, Ռենո Կապյուսոնի, Արաբելա Շտայնբախերի, Աննա Տիֆուի, Ֆրանչեսկա Դեգոյի, Սթիվեն Իսերլիսի, Մարիա Ժուան Պիրեշի, Դավիթ Գերինգասի, Խաթիա Բունիաթիշվիլիի, Սերգեյ Կրիլովի, Սերգեյ Նակարիակովի, Դենիս Կոժուխինի հետ։

Նա ղեկավարել է Թագավորական ֆիլհարմոնիկ նվագախումբը, Անգլիայի կամերային նվագախումբը, Հայաստանի ազգային կամերային նվագախումբը, Լեհաստանի Բալթյան ֆիլհարմոնիկ նվագախումբը, Վրոցլավի ֆիլհարմոնիկ, Վրաստանի ֆիլհարմոնիկ, Մոսկվայի քաղաքային ֆիլհարմոնիկ, Սարաևոյի ֆիլհարմոնիկ, Լիբանանի ֆիլհարմոնիկ նվագախմբերը, BBC-ի համերգային նվագախումբը, Պեկինի սիմֆոնիկ նվագախումբը։